Isa 28 | NdeIBE | STEP | Maye kulowomqhele wamaluba, iqhono lezidakwa zako-Efrayimi, kuluba elibunayo, ubuhle obukhazimulayo kubekwe ngaphezulu kwesigodi esivundileyo – kulelodolobho, iqhono lalabo asebelaliswe liwayini phansi!

Isaiah 28

Maye ku-Efrayimi

1 Maye kulowomqhele wamaluba, iqhono lezidakwa zako-Efrayimi, kuluba elibunayo, ubuhle obukhazimulayo kubekwe ngaphezulu kwesigodi esivundileyo – kulelodolobho, iqhono lalabo asebelaliswe liwayini phansi!

2 Khangelani, uJehova ulaye olamandla oqinileyo. Njengesiqhotho lomoya odilizayo, njengezulu lesiphepho lesihlambi esilamandla, uzakuphosa phansi ngamandla amakhulu.

3 Umqhele lowo wamaluba, iqhono lezidakwa zako-Efrayimi kuzanyathelwa ngaphansi kwezinyawo.

4 Leliyaluba elibunayo, ubuhle bakhe obukhazimulayo, kuhlanyelwe ngaphezu kwesigodi esivundileyo, lizakuba njengomkhiwa ovuthiweyo kungakavunwa okuthi khonokho nje omunye ewubona awukhe ngesandla sakhe awuginye.

5 Ngalolosuku uJehova uSomandla uzakuba ngumqhele okhazimulayo, umqhele wamaluba omuhle kulabo abayizinsalela zabantu bakhe.

6 Uzakuba ngumoya wokulunga kulowo owahlulelayo, umthombo wamandla kulabo ababuyisela impi emuva isisesangweni.

7 Lalaba bayadiyazela ngenxa yewayini, babhadazele ngenxa yotshwala. Abaphristi labaphrofethi bayadiyazela ngenxa yotshwala, njalo baphambene ngenxa yewayini; bayabhadazela ngenxa yotshwala, bayadiyazela, lapho bebona imibono, bayakhininda lapho besenza izinqumo.

8 Amatafula wonke agcwele amahlanzo njalo akulandawo engelamanyala.

9 “Ngubani lowo ozama ukumfundisa? Umbiko wakhe uwuchazela bani na? Kulabobantwana abaphusiswe ekumunyeni lalabo abasanda kukhutshwa ebeleni na?

10 Ngoba kumi kanje: Yenza lokhu, yenza lokhu, umthetho phezu komthetho, umthetho phezu komthetho; kuthiwe hatsha lapha, hatsha laphayana.”

11 Kungasenani, ngezindebe zabezizweni langolimi olungaziwayo, uNkulunkulu uzakhuluma ebantwini bakhe, 12 atshoyo kubo wathi, “Le yindawo yokuphumula, abadiniweyo kabaphumule;” njalo, “Le yindawo yokucambalala.” kodwa kabalalelanga.

13 Ngakho ilizwi likaJehova kubo lizakuba ngelithi: Yenza kuphela njalo yenza kuphela. Umthetho phezu komthetho, okuncane lapha, lokuncane laphaya – ukuze bahambe bawe nyovane, balimale, bathiywe, bathunjwe.

14 Ngakho-ke zwanini ilizwi likaJehova lina bantu abaklolodayo, ababusa abantu laba eJerusalema.

15 Lizitshaya izifuba lisithi, “Senze isivumelwano lokufa, senza isivumelwano lethuna. Nxa isijeziso esikhulu sifika, kasiyikusithinta, ngoba senze amanga aba yisiphephelo sethu lenkohliso yaba yindawo yethu yokucatsha.”

16 Ngakho lokhu yikho okutshiwo nguJehova woBukhosi: “Khangelani, ngibeka ilitshe eZiyoni, ilitshe elihloliweyo, ilitshe lengosi eliligugu, elesisekelo esiqinisekileyo; lowo othembayo akayikuphela amandla.

17 Ngizakwenza okufaneleyo kube yintambo yokulinganisa, ukulunga kube yintambo yokuqondisa; isiqhotho sizakhukhula isiphephelo senu, amanga, lamanzi azagabhela indawo yenu yokucatsha.

18 Isivumelwano senu lokufa sizakwesulwa; isivumelwano senu lengcwaba kasiyikuma. Lapho isijeziso esikhulu sifika zizalilahla phansi.

19 Ngazo zonke izikhathi esizafika ngazo sizalithatha; ukusa ngokusa, emini lebusuku, sizalikhukhula.” Ukulizwisisa ilizwi leli kuzaletha ukwesaba khona ngokwakho.

20 Umbheda mfitshane kakhulu ukuba unabe kuwo, ingubo incane kakhulu ukuba ugoqelwe ngayo.

21 UJehova uzavuka njengalokho akwenzayo entabeni iPherazimi; uzathukuthela njengaseSigodini seGibheyoni – ukuba enze umsebenzi wakhe, umsebenzi oyisimanga, enze umsebenzi wakhe, umsebenzi ongaziwayo.

22 Khathesi-ke yekelani ukukloloda kwenu funa amaketane elibotshwe ngawo alisinde kakhulu; UJehova, uJehova uSomandla usengitshele ngesimiso sokutshabalalisa ilizwe lonke.

23 Lalelani lizwe ilizwi lami; lalelani lizwe engikutshoyo.

24 Lapho umlimi elima ukuba ahlanyele, ulima kokuphela na? Uqhubeka elima umhlabathi ewubhuqa kokuphela na?

25 Nxa umhlabathi esewendlale kuhle, kahlanyeli ikharawayi ahlanyele lekhumini na? Kahlanyeli ingqoloyi endaweni yayo; ibhali ensimini yayo, lepelithi ensimini yaso na?

26 UNkulunkulu wakhe uyamfundisa, amfundise indlela eqondileyo.

27 Ikharawayi kayibhulwa ngesileyi; lenqola kayihanjiswa phezu kwekhumini, kodwa ikharawayi ibhulwa ngentonga, kuthi ikhumini ibhulwe ngombhulo.

28 Amabele kumele acholwe ukuba kwenziwe isinkwa, ngakho umuntu kawabhuli kokuphela. Lanxa ehambisa inqola yakhe yokubhula phezu kwawo, amabhiza akhe kawawacholi.

29 Konke lokhu lakho kuvela kuJehova uSomandla; omangalisayo ngokwaluleka, njalo olenhlakanipho emangalisayo.